Oh patri mia, io’ ‘un ti dicu nenti
tu mi mittisti o munnu e’ fu cuntenti,
poi fu disgrazia o fu castiu i Diu,
tu mi lassasti nicu e ti pirdi’u .
Ricuordu havi’a finutu i puocu a uerra
ma nuddu pinio’ a fami n’ta sta’ terra,
cu schinu, cu zappuni, e chi zappuddi,
ortaggi, ranu, e fila di rapuddi.
A nonna mia chi ligna cuscinava
c’un piattu di fasula m’ascialava,
n’ta cascia si tini’a pani caliatu
prima vini’a vagnatu e poi cunzatu.
Quannu fasci’a a pasta chi pastiddi,
da cuntintizza io’ vidi’a li stiddi,
e n’finu c’on si vriugnavanu i pignati,
sempri patati e vruocculi affucati .
Sutta e travagghi eramu struduti
ma in canciu si scoppiava di saluti,
pi stari m’piedi e rinfurzari u schinu,
pani caliatu e a schicciuledda o vinu.
‘ddi tiempi oramai fuoru scurdati,
i figghi nostri su tutti viziati
‘un manca nenti, sempri pranzi fini,
apposta i spitali sunnu sempri chini.
N’ta ricchia tutti cu telefoninu
passianu avanti e arriedu a culu chinu,
su tutti strapurtati di la scienza,
‘un fuoru n’zignati n’ta malipatienza.
Ora ca i tiempi nuostri su passatii,
e i viecchi cummattimu ca saluti,
u desideriu e’ moriri cuntenti,
spirannu c’a sti figghi ‘un manca nenti !
Nessun commento:
Posta un commento
Nota. Solo i membri di questo blog possono postare un commento.