Giovanni Giardina propone ‘Ncuntravu u Signuri ! di Ignazio Butitta

                                             ‘Ncuntràvu u Signuri pa strata e ci dissi:

                                             ’Un  t’affrunti a caminàri  scausu ?

                                              Era stancu, l’ossa rusicàti da camula ,

                                              a tonaca sfardàta e a vucca sicca e circàva  acqua;

                                              Facìa  pietàti a vidillu!

                                              Ma pinzannu a chiddu chi nni fici,

                                              pu piaciri di mittirinni o munnu,

                                              e vidirinni, arrubbari,odiari ,assicutàri  i dinari

                                              e godiri du mali di l’autri;

                                              Vi dicu a virità: ……‘Un mi spuntò na lacrima !

                                              E facìa ‘mprissioni, un picciottu di trentatrianni

                                              beddu , iautu, ussutu ,

                                              cu l’occhi di ova di palumma figghiati ‘nta pagghia.

                                              Facìa ‘mprissioni dda taliatùra d’omu ca trasèva

                                             ‘nto cori cumu  cu ventu   di ciatu,

                                             ‘nto cori cumme  lingua d’agneddu  e capricchi di matri.

                                              Ma  pinsannu  a chiddu chi nni fici,

                                              pu piaciri di vidirinni scippàri l’occhi l’unu  cu l’autru,

                                              ammazzarinni, chiantàri bannèri di vittoria ‘nte panze di morti,

                                              Vi dicu a virità :…….. Nun mi spuntò na lacrima !

                                              Ci dissi sulu:……Era Miegghiu si non nascèvi,

                                              si non scinnèvi ‘nterra e non murivi ‘nta  Cruci !

                                              Nuatri, fussimu nenti, né pampini , né ciuri

                                              e mancu carni punciuta di l’api  manciata di vermi.

                                              Fussimu nenti, negghi senza timpesta ,

                                              e senza trona e lampi ‘nto cielu ,e  tirrimoto ‘nterra…. nenti!

                                              Era stancu……….,mi taliava,…… e chiancìa,

                                              cumu  nu  nnoccenti,  chi ‘nchiana  o  patibulu !