Sangu tradituri! di Giovanni Giardina

Oh sangu, sangu , sangu mia aduràtu !

servu fedeli i quannu sugnu natu,

o fu pirchì ‘un sa mentiri, o fu pi eredità,

ca ti purtàsti appriessu  u D.N.A.

Privu di jammi , liquidu e fluidùsu

di vini mia canùsci ogni purtùsu,

riccu di globuli russi, janchi e di piastrini,

mastru di geni e chinu di proteini.

Mai, ha canusciùtu pinuli o duttùri,

o puramenti cacchi  prufissùri,

pi chistu m’impignàiu a vita mia,

pi nun ti fari veniri anemìa.

Saziu pi sustanzi  ‘nto manciàri

tu ha scurrùtu i vini ,senza sciatàri,

sempri ha nutrùtu organi vitàli,

e mai ha scircàtu analisi o spitàli.

Ma u cori però,puru  havùtu fedi

e t’ha pompàtu da testa finu e piedi,

sulu pi  scanti, sfuorzi o agitazioni,

t’ha fattu sballàri  i testa o di prissioni.

Passaggi ti nn’ha datu, ‘un sacciu quanti,

costrettu a fari battiti custànti,

mai t’ha chiudùtu transitu all’aorta,

o t’ha lassàtu  i fora , arriedu a porta !

Quantu  pugnalàti  s’assuppàtu ?

Quantu frecci p’amuri ha riscivùtu ?

Puru feritu a morti pa passioni,

ha spintu u sangu a fari donazioni.

Oh sangu, sangu, sangu tradituri !

ora ca sugnu debuli i prissioni,

pir mi ‘un provi mancu cumpassioni !

Quannu nn’avì  assà ci u davi a tutti,

ora ca ci nn’è picca :

invesci di pinsàri pu patrùni,

ci u st’ha fannu sucàri……

a un pugnu di farabutti e di latrùni !