Nta stati o me paisi! Poesia di G. Giardina-18-07-2013

Si Diu nun m’avissi datu aiùtu,

a st’ura ....già mi nn’avissi iùtu ,

Nun bastava ca ‘nto‘nviernu stàmu esiliàti ,

pi cumpletari , ci mancava sulu a stati !

Pi nesciri fora e ghirimi a svagàri

nu sacciu mancu iò p’unni pigghiàri.

E l’ammininistraturi allura, chi ci stà a fari ?

Tra chiddu co n’ha fattu e chiddu c’on fasci nenti,

mi livàru puru u spassu, di iri o Portinenti .

Scuola, giustizia, trasporti, sanità, ecc..

su tutti segni di alta civiltà !!

Ma n’uautri , simu sulu buoni pi pagàri ,

e quannu poi ha bisuognu , eh ! pò cripàri !

Mi disci u dutturi : “ Niesci, vatti a svagàri ”

“Unni ? Quannu ? S’on truovu mancu u largu pi pisciàri,”

A machina mia, già l’ebbi a fermàri,

pirchì ‘nta stu paisi, ‘un si pò cir-co-là-ri !!

Machini, casini, divieti unni và và,

questa è la nuda e cruda realtà !

Ca scusa ca i turisti portanu sordi,

nuautri , nni ritruvàmu cchiù ‘nta merda !

Tra fiesti, fistini, sonàti , cazzi e mazzi,

c’esti cu futti e cu è chi fa ’ntrallàzzi ,

e u rincoglionitu, dintra, nun capisci,

quannu cumincia a stati e quannu finisci !

E allura u svinturàtu ch’avi a fari ?

Mancu na vuccàta d’aria pò pigghiàri !

Stàsci crusciàtu dintra e si dumanna,

sa sua è pinitenza, o na cunnana .

L’anzianu,u sciuncu, u poviru, u disgraziàtu,

quannu mai, ha statu cunsidiràtu ?

Smanìa dintra ,di niervi mancu mancia,

e spera sempri , ca musica ci cancia !

Comunque : Iò stu Sinnacu u ringraziu,

ca pi l’aria, ancòra ‘un pagu daziu

e quannu mi fazzu cacchi caminàta,

‘un pagu ancòra a carta bullàta !